Да 100-годдзя з дня нараджэння народнага пісьменніка Беларусі, празаіка, драматурга, грамадскага дзеяча Івана Пятровіча Шамякіна ў Вердаміцкай і Велікасельскай бібліятэках быў арганізаваны агляд персанальнай выставы “Роднае слова ад Івана Шамякіна”.
30 студзеня ўдзельнікі аматарскага аб’яднання “Гармонія” Вердаміцкай бібліятэкі пазнаёміліся з жыццёвым і творчым шляхам сусветнавядомага беларускага празаіка. Жанчынам было цікава даведацца аб няпростых старонках жыцця, пра першыя вершаваныя і празаічныя творы юбіляра, прасачыць станаўленне І.Шамякіна, як сапраўднага майстра беларускай літаратуры, знаўцу чалавечых адносін і характараў. Бібліятэкар зрабіла агляд найбольш вядомых і цікавых твораў пісьменніка на грамадскія, сацыяльна-маральныя, сямейна-бытавыя тэмы, тэмы подзвігу і гераізму, такія як “Глыбокая плынь”, “Сэрца на далоні”, “Вазьму твой боль”, Атланты і карыятыды” і іншыя. Для паўнаты ўспрымання падаваемага матэрыялу і пашырэння зацікаўленасці творчасцю І.Шамякіна быў прадэманстраваны буктрэйлер па раману “Злая зорка”, у якім адлюстраваны трагедыя Чарнобыля і яго наступствы. Таксама актыўны чытач бібліятэкі і аматар беларускага слова Алла Багатырэвіч распавяла аб сваіх думках, пачуццях і хваляваннях падчас чытання гэтага твора, парэкамендавала ўсім прысутным кнігу для знаёмства.
30 студзеня ў Велікасельскай бібліятэцы падчас знаёмства з выставай былі прадстаўлены зборнікі твораў розных гадоў выдання, асобныя творы аўтара, творы, па якіх зняты кінафільмы і перакладзеныя на рускую мову, фотаздымкі з сямейнага альбома аўтара. Бібліятэкар расказала прысутным пра асноўныя моманты жыцця і творчасці Івана Шамякіна, правяла падрабязны агляд твораў з фонду бібліятэкі. Прысутныя зацікавіўшыся творчасцю народнага пісьменніка, выбралі кнігі для дамашняга чытання. Сустрэча атрымалася пазнавальнай і пакінула станоўчыя эмоцыі ў душы кожнага прысутнага.
