19 лютага ў Велікасельскай бібліятэцы і Навадворскай, Нязбодзічскай бібліятэках-цэнтрах краязнаўства прайшлі інтэлектуальна-гульнёвыя мерапрыемствы, прысвечаныя Міжнароднаму дню роднай мовы.

Юныя чытачы Велікасельскай бібліятэкі прынялі ўдзел у гульні-віктарыне “Каб мова родная гучала”. У пачатку сустрэчы бібліятэкар нагадала прысутным, чаму менавіта 21 лютага адзначаецца гэты дзень, падкрэсліла, што беларуская мова прызнана ЮНЕСКА другой у свеце па мілагучнасці пасля італьянскай. У ходзе мерапрыемства дзеці праявілі веданне роднай мовы ў конкурсах “Загадкі”, “Перакладчыкі”, адказалі на пытанні віктарыны “Старонкі мінулага і сучаснага”, прынялі ўдзел ў гульні “Пазнай партрэт пісьменніка”, адгадалі зашыфраваныя ў малюнках фразеалагізмы, пасрабавалі сябе ў якасці паэтаў, складаючы верш пра мову па зададзеных рыфмах. У канцы мерапрыемства бібліятэкар пазнаёміла прысутных з выданнямі  серыі “Таямніцы беларускай мовы”.

У Навадворскай бібліятэцы-цэнтры краязнаўства прайшла інтэлектуальная гульня “Каларытнае і трапкае беларускае слова”. Сустрэчу бібліятэкар распачала прыгожым вершам беларускага паэта-песенніка Рыгора Барадуліна “Матылёк”, прапанавала дзецям пазнаёміцца з адметнасцямі нашай роднай мовы, на якіх грунтуецца меркаванне замежных вучоных аб тым, што беларуская мова з’яўляецца “другой па мілагучнасці пасля італьянскай”. Затым дзеці прынялі ўдзел у гульні  “Аматары беларускага фальклору”, “Адгадай мелодыю”. У конкурсах “Граматычнае лато”, “Куфэрак слоў”, “Прадоўжы твор” адказвалі на пытанні задання “Старонкі мінулага і сучаснага”.  Напрыканцы мерапрыемства вучні выказалі свае меркаванні аб тым, што кожны беларус павінен вывучаць, ведаць, любіць сваю родную мову і ёй ганарыцца.

Юныя чытачы Нязбодзіцкай бібліятэкі-цэнтры краязнаўства прынялі ўдзел у інтэлектуальнай гульні “Каларытнае і трапкае беларускае слова”. Сустрэча распачалася з  дэкламацыі вершаў   В.Віткі “На свеце добрых слоў не мала”,  П.Панчанкі “Ільняная і жытнёвая…”, П.Броўкі ”Калі ласка!”. Далей дзеці ўключыліся ў конкурсы і гульні на веданне беларускай мовы: “Беларускія загадкі”,  “Скорагаворкі”,  “Назаві адным словам”,  “Прыказкі”, “Скажы па-беларуску”. Напрыканцы бібліятэкар зрабіла агляд новых беларускамоўных выданняў, якія дзеці з ахвотай узялі для чытання.